ໃນຕອນບ່າຍ ຂອງວັນທີ 16 ກັນຍາ 2024 ຜ່ານມາ ທີ່ສຳນັກງານນາຍົກລັດຖະມົນຕີ, ທ່ານ ສຸພົນ ຈັນທະວີໄຊ, ຄະນະບໍລິຫານງານພັກກະຊວງ ເຕັກໂນໂລຊີ ແລະ ການສື່ສານ, ຄະນະພັກຮາກຖານ, ຜູ້ອໍານວຍການໃຫ່ຍ ກຸ່ມບໍລິສັດ ລາວໂທລະຄົມມະນາຄົມ ມະຫາຊົນ ພ້ອມດ້ວຍຄະນະ ໄດ້ມອບເງິນຊ່ວຍເຫຼືອນໍ້າຖ້ວມເພື່ອປະກອບສ່ວນບັນເທົາທຸກແກ້ໄຂໄພພິບັດທຳມະຊາດ ມູນຄ່າ 1,570,000,000 ກີບ ໃນນີ້: ເປັນເງິນສົດ 1 ຕື້ກີບ, ເປັນເຄື່ອງອຸປະໂພກ ບໍລິໂພກ 570 ລ້ານກີບ, ໂດຍມີ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ເຂົ້າຮ່ວມເປັນສັກຂີພະຍານ, ຕາງໜ້າລັດຖະບານຮັບໂດຍ ທ່ານ ນາງ ໃບຄໍາ ຂັດທິຍະ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ທັງເປັນຮອງປະທານຄະນະກໍາມະການຄຸ້ມຄອງໄພພິບັດແຫ່ງຊາດຂັ້ນສູນກາງ ໂດຍມີ ພະນະທ່ານ ສອນໄຊ ສີພັນດອນ, ກໍາມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ເຂົ້າຮ່ວມເປັນເປັນສັກຂີພະຍານ

ໃນພິທີ ພະນະທ່ານ ສອນໄຊ ສີພັນດອນ ໄດ້ລາຍງານສະພາບໄພພິບັດທຳມະຊາດທີ່ເກີດຂຶ້ນ ແລະ ໄດ້ສະແດງຄວາມຂອບໃຈຊົມເຊີຍຕໍ່ ກຸ່ມບໍລິສັດ ລາວໂທລະຄົມມະນາຄົມ ມະຫາຊົນ ທີ່ມີຈິດໃຈມະນຸດສະທຳ, ເອື້ອເຟື້ອເຜື່ອແຜ່ໃຫ້ການຊ່ວຍເຫລືອຕໍ່ບັນດາຜູ້ປະສົບອຸທຸກກະໄພໃນຄັ້ງນີ້, ເຖິງວ່າສະພາບເສດຖະກິດມີຄວາມຫຍຸ້ງຍາກແຕ່ການຊ່ວຍເຫລືອດັ່ງກ່າວແມ່ນສອດຄ່ອງກັບຄວາມຮຽກຮ້ອງຕ້ອງການຂອງສະພາບຕົວຈິງໃນປະຈຸບັນ, ພ້ອມນີ້ ຍັງເປັນການເສຍສະຫລະເພື່ອປະກອບສ່ວນເຂົ້້າໃນການແກ້ໄຂຜົນກະທົບ ແລະ ຟື້ນຟູຊີວິດການເປັນຢູ່ຂອງປະຊາຊົນຜູ້ປະສົບໄພທຳມະຊາດໃຫ້ກັບຄືນສູ່ສະພາບປົກກະຕິໂດຍໄວ, ທັງສ່ອງແສງໃຫ້ເຫັນເຖິງຄວາມເປັນຫວ່າງເປັນໄຍ, ໃຫ້ກຳລັງໃຈເຊິ່ງກັນ ແລະ ກັນໃນເວລາທີ່ພົບຄວາມຫຍຸ້ງຍາກ. ພ້ອມດຽວກັນນັ້ນ ທ່ານຍັງໄດ້ສະແດງຄວາມຢືນຢັນວ່າຈະນຳເອົາການຊ່ວຍເຫລືອດັ່ງກ່າວ, ນຳໃຊ້ເຂົ້້າໃນການຊ່ວຍເຫລືອບັນເທົາທຸກ ໃຫ້ແກ່ຜູ້ປະສົບໄພພິບັດດ້ວຍຄວາມໂປ່ງໃສ່, ໃຫ້ເຖິງ ແລະ ຖືກເປົ້າໝາຍຢ່າງແທ້ຈິ່ງ.

ການຊ່ວຍເຫລືອໃນຄັ້ງນີ້ ນອກຈາກເປັນເງິນ ແລະ ເຄື່ອງອຸປະໂພກ-ບໍລິໂພກແລ້ວ, ກຸ່ມບໍລິສັດ ລາວໂທລະຄົມມະນາຄົມ ມະຫາຊົນ ຍັງໃຫ້ການສະໜັບສະໜູນຊ່ວຍເຫຼືອ ທາງດ້ານການໃຫ້ບໍລິການໂທລະຄົມ ທີ່ເປັນດາຕ້າອິນເຕີເນັດ ແລະ ຄ່າໂທ ລວມມູນຄ່າປັດຈຸບັນທັງໝົດ 7,339,650,000 ກີບ ພ້ອມທັງສືບຕໍ່ສຸ່ມໃສ່ແກ້ໄຂ, ເຝົ້າລະວັງທາງດ້ານເຕັກນິກໃຫ້ຮັບປະກັນດ້ານລະບົບເຄືອຂ່າຍໂທລະຄົມມະນາຄົມ ແລະ ຍັງໄດ້ລົງພື້ນທີ່ເພື່ອຢ້ຽມຢາມ, ໃຫ້ກໍາລັງປະຊາຊົນຜູ້ທີ່ໄດ້ຮັບຜົບກະທົບຈາກໄພພິບັດນໍ້າຖ້ວມ, ພ້ອມດຽວກັນນີ້, ກຸ່ມບໍລິສັດ ລາວໂທລະຄົມ ຈະສືບຕໍ່ຊ່ວຍເຫຼືອ ແລະ ຢູ່ຄຽງຂ້າງສັງຄົມລາວ ໃຫ້ຜ່ານພົ້ນວິກິດການຄັ້ງນີ້ໄປດ້ວຍດີ. ກຸ່ມບໍລິສັດ ລາວໂທລະຄົມມະນາຄົມ ມະຫາຊົນ ຂໍຢູ່ຄຽງຂ້າງສັງຄົມພາຍໄດ້ຄຳຂັວນທີ່ວ່າ: “ລາວ ໂທລະຄົມ ໂທລະຄົມຂອງຄົນລາວ ເພື່ອສັງຄົມລາວ”