ລາວ ໂທລະຄົມ ອຸປະຖໍາການແຂ່ງຂັນກິລາດອກ ປີກໄກ່ທົ່ວປະເທດ ຄັ້ງທີ II

ໃນວັນທີ 04 ພະຈິກ 2020 ບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ເຂົ້າຮ່ວມພິທີເປີດ ການແຂ່ງຂັນກິລາດອກປີກໄກ່ທົ່ວປະເທດ ປະເພດທີມ ຄັ້ງທີ II ຊີງຂັນທ່ານນາຍົກລັດຖະມົນຕີ ລະຫວ່າງວັນທີ 3-6 ທັນວາ 2020 ທີ່ເດີ່ນສະໂມສອນດອກປີກໄກ່ເສດຖາ ບຶງຂະຫຍອງ ນະຄອນຫຼວງວຽງຈັນ. ໃຫ້ກຽດເຂົ້າຮ່ວມໃນພິທີເປີດຄັ້ງນີ້ໂດຍ ທ່ານ ບຸນເຫຼືອ ສີນໄຊວໍລະວົງ ຮອງລັດຖະມົນຕີ ກະຊວງການເງິນ ປະທານສະຫະພັນດອກປີກໄກ່ແຫ່ງຊາດ ພ້ອມດ້ວຍຄະນະ, ທ່ານ ລັດຖະປັນຍາ ຂຽວວົງພະຈັນ ຮອງຜູ້ອໍານວຍການໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ແລະ ຜູ້ໃຫ້ການສະໜັບສະໜູນ, ຄູຝຶກ, ນັກກິລາ ແລະ ສື່ມວນຊົນທຸກຂະແໜງການເຂົ້າຮ່ວມ

ໃນໂອກາດການຈັດການແຂ່ງຂັນຄັ້ງນີ້ ລາວ ໂທລະຄົມ ໄດ້ໃຫ້ການອຸປະຖໍາທັງໝົດ 30,000,000 ກີບ ໃນນັ້ນເປັນເງິນສົດ 15,000,000 ກີບ ແລະ ບັດຕື່ມເງິນ ມູນຄ່າ 15,000,000 ກີບ. ເພື່ອເປັນການປະກອບສ່ວນລາງວັນໃຫ້ກັບນັກກິລາຜູ້ເຂົ້າແຂ່ງຂັນ. ການແຂ່ງຂັນກິລາດອກປີກໄກ່ທົ່ວປະເທດຄັ້ງນີ້ຈັດຂື້ນເພື່ອເປັນການສະເຫຼີມສະຫຼອງ 2 ວັນປະຫວັດສາດ ຄື: ວັນຊາດທີ 2 ທັນວາ ຄົບຮອບ 45 ປີ ແລະ ວັນຄ້າຍວັນເກີດຂອງທ່ານ ປະທານ ໄກສອນ ພົມວິຫານ ຄົບຮອບ 100 ປີ ເຊິ່ງເປັນວັນທີ່ມີຄວາມໝາຍຄວາມສໍາຄັນຍິ່ງຕໍ່ປວງຊົນລາວທັງຊາດ, ເປັນການສ້າງຂະບວນການແຂ່ງຂັນ ແລະ ການຫຼີ້ນກິລາດອກປີກໄກ່ທົ່ວປະເທດໃຫ້ມີຄວາມຟົດຟື້ນ; ເປັນເວທີໃຫ້ນັກກິລາໄດ້ມີໂອກາດໃນການທົດສອບສີມືຂອງຕົນເອງ ແລະ ເລືອກເຟັ້ນໄດ້ນັກກິລິດີເດັ່ນປະກອບເຂົ້າເປັນນັກກິລາທີມຊາດໃນແຕ່ລະລຸ້ນອາຍຸ ແລະ ເພື່ອກຽມຄວາມພ້ອມໃຫ້ແກ່ນັກກິລາດອກປີກໄກ່ໃນການແຂ່ງຂັນກິລາແຫ່ງຊາດ ທີ່ມີແຜນຈະຈັດຂື້ນໃນຕົ້ນປີ 2021 ທີ່ຈະມາເຖີງນີ້.

ການແຂ່ງຂັນຄັ້ງນີ້ມີ 28 ພາກສ່ວນເຂົ້າຮ່ວມທີ່ມາຈາກ 6 ແຂວງ ແລະ ສະໂມສອນຕ່າງໆໃນ ນະຄອນຫຼວງວຽງຈັນ ລວມມີ 58 ທີມ ແຂ່ງຂັນ 6 ປະເພດຄື: ທີມຍິງ, ທີມຊາຍທົ່ວໄປ, ທີມປະສົມທົ່ວໄປ, ທີມເຍົາວະຊົນຊາຍ, ທີມເຍົາວະຊົນປະສົມ ແລະ ທີມອາວຸໂສ ມີນັກກິລາເຂົ້າຮ່ວມ 370 ກວ່າຄົນ. “ ລາວ ໂທລະຄົມ ໂທລະຄົມຂອງຄົນລາວ ເພື່ອສັງຄົມລາວ ”

img

View: 1703 | 12/7/2020 11:15:30 PM | ຊ່ວຍເຫຼືອສັງຄົມ

ຍ້ອນກັບ

ຮູບພາບທີ່ກ່ຽວຂ້ອງ



Copyright © 2021 , All Rights Reserved | Version : 2.0