ກຸ່ມບໍລິສັດ ລາວໂທລະຄົມມະນາຄົມ ມະຫາຊົນ ຮ່ວມກັບ ກຸ່ມຈິດອາສາ BB Auto shop ມອບ ເຄື່ອງຊ່ວຍເຫລືອໃຫ້ແກ່ຜູ້ປະສົບໄພນໍ້າຖ້ວມ-ດິນເຈື່ອນ ຢູ່ເມືອງຂວາ ແຂວງຜົ້ງສາລີ.

ໃນຕອນເຊົ້າວັນທີ: 17 ກັນຍາ 2022 ຜ່ານມາ ກຸ່ມບໍລິສັດ ລາວໂທລະຄົມມະນາຄົມ ມະຫາຊົນ ຮ່ວມກັບ ກຸ່ມຈິດອາສາ BB Auto shop ໄດ້ເດີນທາງໄປມອບເຄື່ອງຊ່ວຍເຫຼືອໃຫ້ຜູ້ປະສົບໄພນໍ້າຖ້ວມຢູ່ເມືອງຂວາ ແຂວງຜົ້ງສາລີ ເຊິ່ງເຄື່ອງທີ່ນໍາໄປມອບໃນຄັ້ງນີ້ລວມມີ ປູນຊີມັງ ຈໍານວນ 15 ໂຕ່ນ, ສັງກະສີ ຈໍານວນ 200 ແຜ່ນ, ເຫຼັກຕະປູ ຈໍານວນ 07 ແກັດ, ເຄື່ອງນຸ່ງ ແລະ ຜ້າຫົ່ມຈຳນວນໜຶ່ງ ລວມມູນຄ່າທັງໝົດ 40.000.000 ກີບ ເພື່ອນຳໄປມອບໃຫ້ຄອບຄົວ, ພໍ່ແມ່ປະຊາຊົນທີ່ຖືກໄພພິບັດນໍ້າຖ້ວມໃນ 03 ບ້ານຄື: ບ້ານລາດຊາງ, ບ້ານສິນໄຊ ແລະ ບ້ານຫາດນາງ. ຕາງໜ້າກຸ່ມບໍລິສັດ ລາວໂທລະຄົມມະນາຄົມ ມະຫາຊົນ ມອບເຄື່ອງຄັ້ງນີ້ໂດຍ ທ່ານ ມານະຈິດ ວົງວີວັນ ອຳນວຍການ ລາວ ໂທລະຄົມ ສາຂາ ແຂວງຜົ້ງສາລີ ແລະ ທ່ານ ດາລາສິນ ສຸດທິພົງ ປະທາານ ກຸ່ມຈິດອາສາ BB Auto Shop ພ້ອມດ້ວຍຄະນະທັງສອງຝ່າຍ, ກ່າວຮັບໂດຍ ທ່ານ ສົມນຶກ ໄຊຍະຈິດ ກໍາມະການປະຈໍາພັກເມືອງ, ຮອງເຈົ້າເມືອງ ຫົວຫນ້າຄະນະຮັບຜິດຊອບໄພພິບັດຂັ້ນເມືອງ, ໃຫ້ກຽດເຂົ້າຮ່ວມພິທີໃນຄັ້ງນີ້ມີ ທ່ານ ພອນທະວີ ໄຊມົນຕີ ກໍາມະການພັກແຂວງ, ເລຂາຄະນະບໍລິຫານງານພັກເມືອງ ເຈົ້າເມືອງ-ເມືອງຂວາ, ມີບັນດາທ່ານໃນຄະນະຮັບຜິດຊອບໄພພິບັດຂັ້ນເມືອງ, ອົງການກ່ຽວຂ້ອງຂັ້ນເມືອງ-ຂັ້ນບ້ານ, ອໍານາດການປົກຄອງບ້ານສິນໄຊ, ພໍ່ແມ່ປະຊາຊົນຊາວບ້ານສິນໄຊ, ທີມງານ ລາວໂທລະຄົມ ສາຂາແຂວງຜົ້ງສາລີ ແລະ ທີມງານກຸ່ມຈິດອາສາ BB Auto shop ເຂົ້າຮ່ວມຢ່າງພ້ອມພຽງ.

ການມອບເຄື່ອງຊ່ວຍເຫຼືອຄັ້ງນີ້ເພື່ອເປັນການຊ່ວຍແບ່ງເບົາໃນການຟື້ນຟູສະພາບບ່ອນຢູ່ອາໄສໃຫ້ແກ່ຜູ້ປະສົບໄພດັ່ງກ່າວກັບຄືນສູ່ສະພາບປົກກະຕິໂດຍໄວ ທັງເປັນການໃຫ້ກໍາລັງໃຈແກ່ພໍ່ແມ່ພີ່ນ້ອງໃນສາມບ້ານດັ່ງກ່າວໃນການຜ່ານຜ່າຄວາມຫຍຸ້ງຍາກໃນຄັ້ງນີ້ໄປພ້ອມໆກັນ.

img
img

View: 3359 | 9/19/2022 2:50:52 PM | ກ່ຽວກັບ ລາວ ໂທລະຄົມ

ຍ້ອນກັບ

ຮູບພາບທີ່ກ່ຽວຂ້ອງ



Copyright © 2022 , All Rights Reserved | Version : 2.0