ກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ II ຂອງ ອົງຄະນະພັກ ກະຊວງເຕັກໂນໂລຊີ ແລະ ການສື່ສານ.

ໃນຕອນເຊົ້າຂອງວັນທີ 4 ເມສາ 2022, ທີ່ຫໍປະຊຸມແຫ່ງຊາດ (ຫຼັກ 6) ໄດ້ຈັດກອງປະຊຸມໃຫ່ຍຜູ້ແທນສະມາຊິກພັກ ຂອງ ອົງຄະນະພັກ ກະຊວງເຕັກໂນໂລຊີ ແລະ ການສື່ສານ ຄັ້ງທີ II ຂື້ນ, ໂດຍການເປັນປະທານຂອງ ສະຫາຍ ບັນດິດ ສຈ ບໍ່ວຽງຄໍາ ວົງດາລາ ກໍາມະການສູນກາງພັກ, ເລຂາຄະນະພັກ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ໃຫ້ກຽດເຂົ້າຮ່ວມຂອງ ສະຫາຍ ປອ ບຸນທອງ ຈິດມະນີ, ກໍາມະການກົມການເມືອງສູນກາງພັກ, ຜູ້ປະຈຳ ການຄະນະເລຂາທິການ​ສູນ​ກາງ​ພັກ, ຮອງປະທານປະເທດແຫ່ງ ສປປ ລາວ, ມີບັນດາຄະນະພັກກະຊວງ, ຮອງລັດຖະມົນຕີ, ຕາງໜ້າຈາກຄະນະກວດກາສູນກາງພັກ, ຄະນະຈັດຕັ້ງສູນກາງພັກ, ຫ້ອງວ່າການສູນກາງພັກ, ພະນັກງານອາວຸໂສ-ອະດີດການນໍາ ຂອງ ກະຊວງເຕັກໂນໂລຊີ ແລະ ການສື່ສານ, ບັນດາແຂກຖືກເຊີນ ແລະ ບັນດາຜູ້ແທນກອງປະຊຸມ ເຂົ້າຮ່ວມ ຈໍານວນທັງໝົດ 216 ສະຫາຍ, ໃນນີ້ມີຜູ້ແທນສົມບູນຈາກຄະນະພັກຮາກຖານ ບໍລິສັດ ລາວໂທລະຄົມມະນາຄົມ ມະຫາຊົນ ແລະ ບັນດາໜ່ວຍພັກທີ່ຂຶ້ນກັບຄະນະພັກກະຊວງ ຈໍານວນ 198 ສະຫາຍ, ຍິງ 63 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທັງໝົດ 709 ສະຫາຍ.

ກອງປະຊຸມໃຫຍ່ຜູ້ແທນສະມາຊິກພັກ ໄດ້ດໍາເນີນພາຍໃຕ້ຄໍາຂວັນ “ຍົກສູງຄວາມຮັບຜິດຊອບຕໍ່ວຽກງານເຕັກໂນໂລຊີ ແລະ ການສື່ສານ ໃຫ້ກາຍເປັນກໍາລັງແຮງຂັບເຄື່ອນໃນການຫັນເປັນ ດິຈິຕອນ ຕາມທິດຫັນເປັນອຸດສາຫະກໍາ ແລະ ທັນສະໄໝ”. ກອງປະຊຸມໃຫຍ່ຄັ້ງນີ້ ບັນດາຜູ້ແທນໄດ້ພ້ອມກັນຕີລາຄາຜົນຂອງການເຄື່ອນໄຫວຈັດຕັ້ງປະຕິບັດໜ້າທີ່ການເມືອງ ແລະ ການກໍ່ສ້າງປັບປຸງພາຍໃນ ຂອງທົ່ວອົງຄະນະພັກ, ຄົ້ນຄ້ວາກຳແໜ້ນບັນດາສາເຫດຂອງຜົນສຳເລັດ, ດ້ານດີ, ດ້ານອ່ອນ ແລະ ຂໍ້ຄົງຄ້າງ, ສາເຫດພ້ອມທັງຖອດຖອນບົດຮຽນ ບົນພື້ນຖານການວິເຄາະໄຈ້ແຍກຈຸດພິເສດສະພາບການດ້ານຕ່າງໆ ເພື່ອເປັນພື້ນຖານພິຈາລະນາຕົກລົງທິດທາງວຽກງານຊຸມປີຕໍ່ໜ້າ, ຕິດພັນກັບການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ໂດຍສະເພາະໃນຂົງເຂດວຽກງານ ເຕັກໂນໂລຊີ ແລະ ການສື່ສານ. ໃນວາລະຂອງກອງປະຊຸມໃຫຍ່ຄັ້ງນີ້ ຜູ້ແທນກອງປະຊຸມໃຫຍ່ຍັງໄດ້ພ້ອມກັນຄົ້ນຄວ້າປະກອບຄຳຄິດ-ຄຳເຫັນ ຕໍ່ຮ່າງບົດລາຍງານການເມືອງ ຊຶ່ງໄດ້ຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ I ຂອງອົງຄະນະພັກກະຊວງເຕັກໂນໂລຊີ ແລະ ການສື່ສານ (ແຕ່ປີ 2016-2021) ແລະ ທິດທາງຄາດໝາຍ ແລະ ວຽກງານຈຸດສຸມໃນ 05 ປີຕໍ່ໜ້າ, ແຜນພັດທະນາຂອງຂະແໜງການເຕັກໂນໂລຊີ ແລະ ການສື່ສານ ແລະ ຮ່າງບົດສໍາຫຼວດການນຳພາລວມ ຂອງຄະນະພັກສະໄໝທີ I; ພ້ອມກັນນັ້ນ ສະມາຊິກພັກສົມບູນກໍ່ຍັງໄດ້ໃຊ້ສິດປະຊາທິປະໄຕຂອງຕົນ ເລືອກຕັ້ງເອົາຄະນະບໍລິຫານງານອົງຄະນະພັກ ກະຊວງເຕັກໂນໂລຊີ ແລະ ການສື່ສານ ສະໄໝທີ II, ກອງປະຊຸມໄດ້ຮັບຮອງເອົາອົງຄະນະພັກກະຊວງ ຊຸດໃໝ່ ຈໍານວນ 21 ສະຫາຍ, ຍິງ 01 ສະຫາຍ.

ຈາກນັ້ນກອງປະຊຸມໃຫຍ່ ຍັງໄດ້ຮັບຟັງການໂອ້ລົມ ແລະ ໃຫ້ທິດຊີ້ນໍາໂດຍກົງຂອງ ສະຫາຍ ປອ ບຸນທອງ ຈິດມະນີ, ກໍາມະການກົມ​ການ​ເມືອງສູນກາງພັກ, ຜູ້ປະຈຳການຄະນະເລຂາທິການ​ສູນ​ກາງ​ພັກ, ຮອງປະທານປະເທດ ແຫ່ງ ສປປ ລາວ, ສະຫາຍ ໄດ້ສະແດງຄວາມເປັນຫ່ວງເປັນໄຍ ແລະ ຍ້ອງຍໍຊົມເຊີຍ ຄະນະພັກຊຸດໃໝ່ ແລະ ສະຫາຍຍັງໄດ້ຮຽກຮ້ອງມາຍັງຄະນະພັກຊຸດນີ້ ຈົ່ງນໍາເອົາເນື້ອໃນຈິດໃຈກອງປະຊຸມໃຫ່ຍຄັ້ງນີ້ ນໍາໄປຜັນຂະຫຍາຍໃຫ້ເກີດດອກອອກຜົນ. ໃນພິທີຍັງໄດ້ມີການຈັດກິດຈະກໍາສະແດງຜົນງານອັນພົ້ນເດັ່ນໃນໄລຍະ 5 ປີ ຂອງບັນດາກະຊວງ, ກົມກອງ ຕ່າງໆ, ມີການຈໍາໜ່າຍຜະລິດຕະພັນ ຂອງບໍລິສັດອ້ອມຂ້າງ ກະຊວງ ເຕັກໂນໂລຊີ ແລະ ການສື່ສານ ເຊິ່ງໃນນີ້ ບໍລິສັດ ລາວ ໂທລະຄົມມະນາຄົມ ມະຫາຊົນ ຍັງໄດ້ຮ່ວມວາງສະແດງຜະລິດຕະພັນ ແລະ ນຳສະເໜີ ນະວັດຕະກຳ ໃໝ່ໆ ເຊັ່ນ: 5G, Cloud, Smart Farm ແລະ ໂຄງການ LPM Excellent Award ໃຫ້ບັນດາແຂກທີ່ເຂົ້າຮ່ວມງານໄດ້ຮັບຊົມອີກດ້ວຍ.

img
img

View: 4398 | 4/8/2022 8:47:33 PM | ກ່ຽວກັບ ລາວ ໂທລະຄົມ

ຍ້ອນກັບ

ຮູບພາບທີ່ກ່ຽວຂ້ອງ



Copyright © 2022 , All Rights Reserved | Version : 2.0