2/1/2018 10:49:43 AM | ກ່ຽວກັບ ລາວ ໂທລະຄົມ

ລາວ ໂທລະຄົມ ເຂົ້າຮ່ວມເປີດຮ້ານວາງສະແດງສິນຄ້າ ໃນງານ ເຕັກໂນໂລຊີ ສື່ສານ ຂໍ້ມູນຂ່າວສານ (LAO ICT EXPO 2018)

ໃນລະຫວ່າງວັນທີ 24-28 ມັງກອນ 2018 ທີ່ຜ່ານມາ ທີ່ສູນການຄ້າ ລາວ-ໄອເຕັກ ລາວ ໂທລະຄົມ ໄດ້ເຂົ້າຮ່ວມເປີດຮ້ານວາງສະແດງສິນຄ້າ ໃນງານ ເຕັກໂນໂລຊີ ສື່ສານ ຂໍ້ມູນຂ່າວສານ ຫຼື LAO ICT EXPO 2018 ເຊິ່ງໃຫ້ກຽດເປີດງານໂດຍທ່ານ: ສົມດີ ດວງດີ

ຮອງນາຍຍົກລັດຖະມົນຕີ, ລັດຖະມົນຕີກະຊວງການເງິນ ແລະ ທ່ານ ປອ ທັນສະໃໝ ກົມມະສິດ ລັດຖະມົນຕີ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ມີບັນດາແຂກຖືກເຊີນຈາກບັນດາກະຊວງ, ອົງກອນທຽບເທົ່າ, ສະຖາບັນການສຶກສາ ແລະ ບໍລິສັດຕ່າງໆເຂົ້າຮ່ວມຫຼາຍກ່ວາ 200 ທ່ານ.

ງານວາງສະແດງໃນຄັ້ງນີ້ ຈັດຂຶ້ນພາຍໃຕ້ຫົວຂໍ້ “ພ້ອມກັນກ້າວໄປສູ່ການຫັນປ່ຽນ ເປັນສັງຄົມດີຈິຕ້ອນ Towards Digital Transformation“ ໃນງານວາງສະແດງ ໄດ້ມີບັນດາ ບໍລິສັດໄອຊີທີ ແຖວໜ້າຈາກພາຍໃນ ແລະ ຕ່າງປະເທດ ເຂົ້າຮ່ວມວາງສະແດງ ໄດ້ມີການສະແດງຫຼາກຫຼາຍ ຜະລິດຕະພັນ ເຕັກໂນໂລຊີ ສື່ສານຂໍ້ມູນຂ່າວສານ ບໍ່ວ່າຈະເປັນ ດ້ານໂທລະຄົມມະນາຄົມ, ດ້ານຄອມພິວເຕີຮາດແວ ແລະ ຊອບແວ, ເຕັກໂນໂລຊີ ລະບົບຄວາມປອດໄພ, ລະບົບໂປແກຣມຮັບໃຊ້ ແລະ ສົ່ງເສີມການນຳໃຊ້ ໄອຊີທິີ ການບໍລິການ, ເອັສເອັມອີ (SME) ແລະ ສະຕາດອັບ (Startup), ການຄ້າ, ການເງິນ, ການຜະລິດ, ກະສິກໍາ, ການສຶກສາ ແລະ ອື່ນໆ ໃນນັ້ນ ກໍມີບັນດາກອງປະຊຸມ ແລະ ສຳມະນາ ທີ່ໜ້າສົນໃຈ ໂດຍສະເພາະກອງປະຊຸມສົນທະນາຜູ້ບໍລິຫານ ໄອຊີທີ ອາຊຽນ ຄັ້ງທີ 6 ກອງປະຊຸມຜູ້ປະກອບການ ໄອຊີທີ ອາຊີ-ປາຊີຟີກ, ກອງປະຊຸມສົນທະນາດີຈິຕອນລາວ ທີ່ມີຜູ້ແທນຈາກຕ່າງປະເທດຈາກບັນດາປະເທດໃນອາຊຽນ ແລະ ອາຊີປາຊີຟີກເຂົ້າຮ່ວມກວ່າ 70 ຄົນ ພ້ອມນັ້ນກໍຍັງມີກິດຈະກຳ ທີ່ໃຫ້ທັງຄວາມຮູ້ ແລະ ຄວາມມ່ວນຊື່ນໃຫ້ແກ່ຜູ້ເຂົ້າຊົມງານ ແລະ ເຄື່ອງແຈກຂອງແຖມຢ່າງຫຼວງຫຼາຍນໍາອີກ.

ໃນນາມກະຊວງເປັນເຈົ້າພາບ ຂອງການຈັດງານວາງສະແດງ ທ່ານ ປອ ທັນສະໄໝກົມມະສິດ ໄດ້ໃຫ້ກຽດກ່າວເປີດງານໂດຍມີເນື້ອໃນບາງຕອນວ່າ ການຈັດງານວາງສະແດງໃນຄັ້ງນີ້ກໍເພື່ອໃຫ້ທຸກພາກສ່ວນໃນສັງຄົມ ໄດ້ສຳພັດຕົວຈິງຂອງການພັດທະນາ ເຕັກໂນໂລຊີສື່ສານ ຂໍ້ມູນຂ່າວສານ ຢູ່ ສປປ ລາວ ແລ້ວ ນອກນັ້ນຍັງມີການນຳເອົາວັດຕະກຳໃໝ່ອອກມາວາງສະແດງນຳອີກດ້ວຍ ສະນັ້ນງານວາງສະແດງຄັ້ງນີ້ ຈຶ່ງເປັນເວທີ ທີ່ສຳຄັນເພື່ອສ້າງກາລະໂອກາດ ໃຫ້ຜູ້ປະກອບການ, ຜູ້ຜະລິດ, ຜູ້ບໍລິການ, ຜູ້ຊົມໃຊ້ ແລະ ຜູ້ຄຸ້ມຄອງເຕັກໂນໂລຊີ ສື່ສານຂໍ້ມູນຂ່າວສານໄດ້ພົບປະແລກປ່ຽນບົດຮຽນຄວາມຮູ້ ຄວາມເຂົ້າໃຈ ແລະ ສ້າງການພົວພັນຮ່ວມມືທາງດ້ານການຄ້າ ແລະ ການພັດທະນາຮ່ວມກັນ, ການພັດທະນາ ໄອຊີທີ ຢູ່ ສປປ ລາວ ກໍມີການຂະຫຍາຍຕົວຢ່າງແຂງແຮງ ເຫັນໄດ້ຈາກຈຳນວນຜູ້ບໍລິການ ແລະ ຜູ້ຊົມໃຊ້ບໍລິການ ເພີ່ມຂຶ້ນຢ່າງຕໍ່ເນື່ອງເຊັ່ນ: ອັດຕາຜູ້ຊົມໃຊ້ໂທລະສັບມືຖື ມີເຖິງ 100% ຈຳນວນຜູ້ປະກອບການກໍເພີ່ມຂຶ້ນກວ່າ 5,000 ບໍລິສັດ ພື້ນຖານໂຄງລ່າງກໍມີການຂະຫຍາຍຕົວຢ່າງຕໍ່ເນື່ອງ ສັນຍານໂທລະສັບມືຖື ກວມ 91% ຂອງຈໍານວນມູ່ບ້ານ ການຂະຫຍາຍບໍລິມາດການເຊື່ອມໂຍງເຄືອຂ່າຍອິນເຕີເນັດ ຂອງບັນດາບໍລິສັດກໍນັບມື້ນັບຫຼາຍຂຶ້ນ.