1/26/2018 3:22:03 PM | ກ່ຽວກັບ ລາວ ໂທລະຄົມ

ງານພົບປະສື່ມວນຊົນ ກັບ ຄະນະຜູ້ບໍລິຫານ ແລະ ນຳສະເໜີ ເຕັກໂນໂລຢີ່ ການບໍລິການ ຂອງ ລາວ ໂທລະຄົມ

ໃນຕອນບ່າຍ ວັນທີ 22 ມັງກອນ 2018 ທີ່ຜ່ານມາ ທີ່ຫ້ອງປະຊຸມ ສໍານັກງານໃຫຍ່ ບໍລິສັດລັດ ວິສາຫະກິດ ລາວ ໂທລະຄົມ (ສາຍລົມ) ນະຄອນຫຼວງວຽງຈັນ ໄດ້ຈັດງານພົບປະສື່ມວນຊົນ ກັບ ຄະນະຜູ້ບໍລິຫານ ແລະ ນຳສະເໜີເຕັກໂນໂລຢີການບໍລິການຂອງ ລາວ ໂທລະຄົມ ຂື້ນ ໂດຍການເປັນປະທານຂອງ ທ່ານ ຖາວອນ ສົມສະກຸນ ຜູ້ອຳນວຍການໃຫຍ່ ບໍລິສັດລັດ ວິສາຫະກິດ ລາວໂທລະຄົມ, ທ່ານ ສຸພົນ ຈັນທະວີໄຊ ຮອງຜູ້ອຳນວຍການໃຫຍ່ຝ່າຍເຕັກນິກ ມີບັນດາຄະນະຜູ້ບໍລິຫານ, ພະນັກງານວິຊາການຈາກຂະແໜງການທີ່ກ່ຽວຂ້ອງຂອງ ລລທ ແລະ ສື່ມວນຊົນທຸກພາກສ່ວນເຂົ້າຮ່ວມ.

ຈຸດປະສົງຂອງການຈັດງານໃນຄັ້ງນີ້ແມ່ນເພື່ອນຳສະເໜີເຕັກໂນໂລຢີການບໍລິການຂອງ ລາວໂທລະຄົມ ໂດຍສະເພາະແມ່ນ ບໍລິການ 4.5G ຫຼື LTE-A (ຫຍໍ້ມາຈາກຄຳວ່າ: Long Term Evolution Advanced) ເຊິ່ງ ລາວ ໂທລະຄົມ ເປັນຜູ້ໃຫ້ບໍລິການ ຜູ້ທໍາອິດ ໃນ ສປປ ລາວ ໃຫ້ກັບສື່ມວນຊົນໄດ້ຮັບຮູ້ ແລະ ເຂົ້າໃຈ ພ້ອມແນະນໍາວິທີການນໍາໃຊ້ທີ່ຖືກຕ້ອງ. ເທັກໂນໂລຢີ 4.5G ແມ່ນການພັດທະນາຕໍ່ຍອດມາຈາກ 4G ເດີມ ເພື່ອເພີ່ມຄວາມສາມາດໃນການ ຮັບ-ສົ່ງ ຫຼື ການດາວໂຫຼດ ແລະ ອັບໂຫຼດ ໄດ້ໄວຂື້ນເພາະລະບົບ 4.5G ແມ່ນການນຳເອົາຄື້ນຄວາມຖີ່ສັນຍານໂທລະສັບທີ່ຕ່າງກັນ ທີ່ ລາວ ໂທລະຄົມ ມີ ມາມັດລວມເຂົ້າກັນເຮັດໃຫ້ການສົ່ງຂໍ້ມູນໄດ້ໃນຈໍານວນຫຼາຍໆພ້ອມໆກັນ ເຮັດໃຫ້ໜ່ວຍມືຖືສາມາດເຊື່ອມຕໍ່ຄື້ນສັນຍານໂທລະສັບໄດ້ຫຼາຍຄື້ນພ້ອມໆກັນ ແລະ ເຮັດໃຫ້ສາມາດຮັບສົ່ງສັນຍານໄດ້ໄວຂຶ້ນຈາກທີ່ເຄີຍຮັບ-ສົ່ງໃນຄື້ນສັນຍານດຽວຕໍ່ມືຖື 1 ໜ່ວຍ. ສະຫຼຸບແລ້ວຄຸນສົມບັດພິເສດຂອງ ລະບົບ 4.5G ຄືການດາວໂຫຼດ ແລະ ການອັບໂຫຼດທີ່ໄວກວ່າ 4G, ຊ່ວຍໃນການຖ່າຍທອດສົດ Video ໄດ້ດີຂື້ນເຊັ່ນ: Facebook Live, Video Call ເປັນຕົ້ນ. ສາມາດຮັບຊົມ Video Live ແລະ Video ທີ່ມີຄວາມລະອຽດຂອງພາບສູງລະດັບ 4K ເມື່ອເວລາຢູ່ໃນສະຖານທີ່ມີຄົນໃຊ້ງານຫຼາຍພ້ອມໆກັນກໍ່ຍັງສາມາດເຂົ້າເຖິງການໃຊ້ງານໄດ້ຢ່າງສະດວກສະບາຍ. ພ້ອມດຽວກັນນີ້ ໃນວາລະຂອງງານ ຄະນະຜູ້ບໍລິຫານ ແລະ ວິຊາການຂອງ ລາວ ໂທລະຄົມ ຍັງໄດ້ຕອບຄໍາຖາມຂອງສື່ມວນຊົນອີກດ້ວຍເຊັ່ນ: ບັນຫາອິນເຕີເນັດຊ້າ, ແພັກເກັດອິນເຕີເນັດໝົດໄວ ແລະ ບັນຫາອຶ່ນໆ ພ້ອມແນະນໍາວິທີການນໍາໃຊ້ທີ່ຖືກຕ້ອງ ແລະ ເປັນການປະຫຍັດ Data. ປັດຈຸບັນ ລລທ ໄດ້ເປີດໃຫ້ບໍລິການລະບົບ 4,5G ແລ້ວໃນນະຄອນຫຼວງວຽງຈັນ ແລະ ເຂດເທດສະບານພາຍໃນ 17 ແຂວງທົ່ວປະເທດ ແລະ ຈະສືບຕໍ່ຂະຫຍາຍໄປສູ່ບັນດາເມືອງຕ່າງໆໃນໄວໆນີ້.