1/18/2018 4:58:39 PM | ກ່ຽວກັບ ລາວ ໂທລະຄົມ

ສະຫະພັນແມ່ຍິງ ລາວ ໂທລະຄົມ ສະຫຼຸບຜົນການຈັດຕັ້ງປະຕິບັດ ຂໍ້ແຂ່ງຂັນ 3 ດີ

ສະຫະພັນແມ່ຍິງ ບໍລິສັດລັດ ວິສະຫະກິດ ລາວ ໂທລະຄົມ (ລລທ ) ໄດ້ຈັດພິທີສະຫຼຸບຜົນການຈັດຕັ້ງ ປະຕິບັດວຽກງານຂໍ້ແຂ່ງຂັນ 3 ດີ ປະຈຳປີ 2017 ຂື້ນເມື່ອ ວັນທີ 5 ມັງກອນ 2018 ໂດຍການເຂົ້າຮ່ວມ ຂອງ ທ່ານ ນາງ ເກສອນ ສຸລິວົງ ຄະນະສູນກາງສະຫະພັນແມ່ຍິງລາວ ທັງເປັນ ປະທານສະຫະພັນແມ່ຍິງ ກະຊວງ ປທສ , ທ່ານ ທອງສີ ວິໄລວົງ ຄະນະພັກກະຊວງ ປທສ ທັງເປັນທີ່ປຶກສາຜູ້ອຳນວຍການໃຫຍ່ ລລທ ພ້ອມດ້ວຍຄະນະສະຫະພັນແມ່ຍິງຮາກຖານ ລລທ ເຂົ້າຮ່ວມ.

ໃນພິທີ ທ່ານ ນາງ ມະນີຈັນ ພິລາວົງ ປະທານສະຫະພັນແມ່ຍິງ ຮາກຖານ ລລທ ໄດ້ສະເໜີ ລາຍງານ ຜົນການຈັດຕັ້ງປະຕິບັດວຽກງານຂໍ້ແຂ່ງຂັນ 3 ດີ ໄລຍະຜ່ານມາ ພ້ອມສະເໜີທິດທາງແຜນການໃນຕໍ່ໜ້າໃຫ້ກອງປະຊຸມໄດ້ຮັບຊາບ , ຈາກນັ້ນ ທ່ານ ນາງ ເກສອນ ສຸລິວົງ ໄດ້ໂອ້ລົມຕໍ່ກອງປະຊຸມ ແລະ ທ່ານໄດ້ ສະແດງ ຄວາມຍ້ອງຍໍຊົມເຊີຍມາຍັງຄະນະສະຫະພັນແມ່ຍິງ ແລະ ເອື້ອຍນ້ອງແມ່ຍິງ ລລທ ທີ່ມີຜົນສຳເລັດໃນການປະຕິບັດຂໍ້ແຂ່ງຂັນ 3 ດີ ທັງສາມາດຮັບຮອງໄດ້ເປັນ ໜ່ວຍ 3 ດີ ຕື່ມອີກ , ຈາກນັ້ນ ທ່ານ ໄດ້ ໃຫ້ທິດຊີ້ນຳໃນການຈັດຕັ້ງປະຕິບັດວຽກງານໃນຕໍ່ໜ້າຄື :

1. ໃຫ້ຄະນະພັກສືບຕໍ່ສ້າງໂອກາດ ແລະ ສ້າງເງືອນໄຂໃຫ້ເອື້ອຍນ້ອງຍິງໄດ້ມີການເຄືອນໄຫວຕາມພາລະບົດບາດ,ຕໍ່ຜູ້ມີຜົນງານກໍ່ໃຫ້ມີການຍ້ອງຍໍຮູບການຕ່າງ ໆ ໃຫ້ທັນການ,ລວມທັງຂະຫຍາຍເຂົ້າເປັນສະມາຊິກພັກ.

2. ສະຫະພັນແມ່ຍິງ ລລທ ຕ້ອງເພີ່ມທະວີສຶກສາອົບຮົມ ການເມືອງ ແນວຄິດ ໃຫ້ເອື້ອຍນ້ອງແມ່ຍິງດ້ວຍຮູບການ ຕ່າງ ໆ ທັງທາງກ້ວາງ ແລະ ທາງເລິກ ແລະ ໃຫ້ເຂົ້າຮ່ວມຮັບຟັງການເຜີຍແຜ່ເອກະສານຕ່າງ ໆ ຂອງພັກ,ຂອງຊາດ ຂອງອົງການຈັດຕັ້ງມະຫາຊົນໃນວັນສຳຄັນຕ່າງ ໆ ສາມ,ສະຫະພັນແມ່ຍິງຕ້ອງເປັນແບບຢ່າງໃນທຸກວຽກງານ,ມີແບບແຜນວິທີເຮັດວຽກ ແບບລວມສູນ,ປະຊາທິປະໄຕ,ຕັດສິນເປັນໜູ່ຄະນະ ສີ່,ສ້າງເງືອນໄຂ ແລະ ເປີດໂອກາດໃຫ້ເອື້ອຍນ້ອງແມ່ຍິງໄດ້ມີໂອກາດໄປຝຶກອົບຮົມ,ຍົກລະດັບຄວາມຮູ້ ດ້ານທິດສະດີການເມືອງ ແລະ ວິຊາສະເພາະຢ່າງຕໍ່ເນຶ່ອງ ແລະ ກ້ວາງຂວາງ.ຕອນທ້າຍຂອງການໂອ້ລົມ ທ່ານ ນາງ ເກສອນສຸລິວົງ ກໍໄດ້ຮຽກຮ້ອງໃຫ້ເອື້ອຍນ້ອງແມ່ຍິງ ລລທ ຈົ່ງມີຄວາມສາມາຄີກັນ ແລະ ສະຫະພັນແມ່ຍິງເພື່ອເຮັດຫຼ້ອນທຸກວຽກງານທີ່ການຈັດຕັ້ງມອບໜາຍໃຫ້ .