9/28/2017 5:34:25 PM | ກ່ຽວກັບ ລາວ ໂທລະຄົມ

ລາວ ​ໂທລະ​ຄົມ​ ເປີດ​ກອງ​ປະຊຸມສຳມະນາ ໃນຫົວຂໍ້ ຄວາມເຂົ້າໃຈພື້ນຖານກ່ຽວກັບການລົງທຶນໃນຮຸ້ນ

ໃນຕອນບ່າຍຂອງ ​ວັນ​ທີ 20 ກັນຍາ 2017 ທີ່ ຜ່ານ​ມາ ຢູ່​ຫ້ອງ​ປະ​ຊຸມໃຫຍ່ 403 A ສຳນັກງານ​ໃຫ່ຍ ລາວ ​ໂທລະ​ຄົມ, ນະຄອນຫຼວ​ງວຽງຈັນ ​ໄດ້​ເປີດ​ກອງ​ປະຊຸມສຳມະນາໃນຫົວຂໍ້ ຄວາມເຂົ້າໃຈພື້ນຖານກ່ຽວກັບການລົງທຶນໃນຮຸ້ນພາຍ​ໃຕ້​ການ​ເປັນ​ປະທານເປີດກອງປະຊຸມ ​ຂອງ ທ່ານ ຈິດປະສົງ ໜູແກ້ວໄກສອນ ຮອງຜູ້ອຳນວຍການໃຫຍ່ ລາວ ໂທລະຄົມ, ແລະ ທ່ານ ນາງສາຍສະໝອນ ຈັນທະຈັກ ຫົວໜ້າສຳນັກງານຄະນະກຳມະການຄຸ້ມຄອງຫຼັກຊັບ ແລະ ເຂົ້າຮ່ວມມີ ທ່ານ ປາວະລິດ ອ່ຽມອໍ່າ ຮອງຜູ້ອຳນວຍການໃຫຍ່ ລາວ ໂທລະຄົມ , ຄະນະຝ່າຍ, ຄະນະພະແນກ, ຄະນະສູນ, ພາກສ່ວນ , ພະນັກງານວິຊາການອ້ອມຂ້າງ ລລທ ສູນກາງ ແລະ ຄະນະຜູ້ບໍລິຫານ ບໍລິສັດຫຼັກຊັບ 4 ບໍລິສັດ ເຂົ້າຮ່ວມຢ່າງພ້ອມພຽງ.

ນອກຈາກນັ້ນຍັງມີຄະນະທີມງານວິທະຍາກອນ ຈາກ ພາກສ່ວນຕ່າງໆ ທີ່ມາບັນລະຍາຍແຕ່ລະຫົວຂໍ້ໃນມື້ນີ້ເຊິ່ງປະກອບດ້ວຍ: 4 ບໍລິສັດເຊັ່ນ:

1/ ຕະຫຼາດຫຼັກຊັບລາວ

2 / ບໍລິສັດ ຫຼັກຊັບລ້ານຊ້າງມະຫາຊົນ

3 / ບໍລິສັດຫຼັກຊັບ BCEL-KT ຈຳກັດ

4 /ບໍລິສັດຫຼັກຊັບລາວ-ຈີນ

ຈຸດປະສົງຂອງການຈັດງານສໍາມະນາໃນຄັ້ງນີ້ ກໍ່ເພື່ອເປັນການເສີມສ້າງຄວາມຮູ້, ຄວາມເຂົ້າໃຈ ທີ່ຖຶກຕ້ອງກ່ຽວກັບວຽກງານຂອງຕະຫລາດທຶນ, ເຖິງແມ່ນວ່າຕະຫຼາດທຶນຂອງລາວມີການພັດທະນາໄດ້ເກືອບ 07 ປີ ແລ້ວ ນັບຕັ້ງແຕ່ປີ 2010 ເປັນຕົ້ນມາ, ເພາະສະນັ້ນສຳນັກງານ ຄຄຊ ຮ່ວມກັບ ບັນດາບໍລິສັດຫຼັກຊັບຕ່າງໆຈຶ່ງໄດ້ມີການເຜີຍແຜ່ຄວາມຮູ້ຄວາມເຂົ້າໃຈກ່ຽວກັບວຽກງານຕະຫຼາດທຶນໃຫ້ແກ່ຄະນະຜູ້ບໍລິຫານ ແລະ ພະນັກງານ ລລທ ຮັບຮູ້ ແລະ ເຂົ້າໃຈຢ່າງເລິກເຊິ່ງ.