8/22/2017 2:47:54 PM | ກ່ຽວກັບ ລາວ ໂທລະຄົມ

ພິທີເຊັນບົດບັນທຶກຄວາມເຂົ້າໃຈ ກ່ຽວກັບຍຸດທະສາດການຮ່ວມມື ແລະ ໂຄງການຂະຫຍາຍເຄືອຂ່າຍ 5G ຢູ່ບັນດາ 7 ແຂວງພາກກາງ ແລະ ພາກໃຕ້ , ລະຫວ່າງ ບໍລິສັດລັດ ວິສາຫະກິດ ລາວ ໂທລະຄົມມະນາຄົມ (LTC) ແລະ ບໍລິສັດ Nokia Shanghai Bell (NSB)

ໃນວັນທີ 18 ສິງຫາ 2017, ບໍລິສັດ ລາວໂທລະຄົມ (LTC) ແລະ ບໍລິສັດ Nokia Shanghai Bell (NSB) ໄດ້ມີພິທີເຊັນສັນຍາ ໂຄງການຂະຫຍາຍເຄືອຂ່າຍ ຂອງລາວໂທລະຄົມ ໄລຍະ 25.5 ແລະ ໄລຍະ 25.6 ພ້ອມດຽວກັນນີ້ກໍ່ໄດ້ມີການເຊັນບົດບັນທຶກຄວາມເຂົ້າໃຈກ່ຽວກັບ ຍຸດທະສາດການຮ່ວມມື ແລະ ໂຄງການຂະຫຍາຍເຄືອຂ່າຍ 5G ຢູ່ບັນດາ ແຂວງພາກກາງ ແລະ ພາກໃຕ້, ຊຶ່ງພິທີດັ່ງກ່າວນີ້ໄດ້ຈັດຂຶ້ນຢູ່ທີ່ໂຮງແຮມຄຼາວພາຊ້າ, ນະຄອນຫຼວງວຽງຈັນ, ໂດຍການເຂົ້າຮ່ວມເປັນສັກຂີພະຍານຂອງຄະນະນຳ, ບັນດາຜູ້ບໍລິຫານ ແລະ ພະນັກງານຂອງທັງສອງບໍລີສັດ.

ອີງໃສ່ເນື້ອໃນຂອງສັນຍາ, ບໍລິສັດ ໂນເກຍຊຽງໄຮ່ເບວ ຈະສະໜອງອຸປະກອນ 4G FDD LTE ແລະ ອຸປະກອນ ດ້ານ IP ພ້ອມທັງການບໍລິການໃຫ້ແກ່ບໍລິສັດ ລາວໂທລະຄົມ ເພື່ອເປັນການພັດທະນາ ແລະ ຂະຫຍາຍການຄວບຄຸມ ສັນຍານໃຫ້ດີຂຶ້ນກວ່າເກົ່າ. ຊຶ່ງໂຄງການດັ່ງກ່າວນີ້ເປັນບາດກ້າວອັນສຳຄັນ ທີ່ຈະຊ່ວຍໃຫ້ບໍລິສັດ ລາວໂທລະຄົມ ຍັບເຂົ້າໃກ້ຈຸດໝາຍ ເຄືອຂ່າຍແບບໄຮ້ຮອຍຕໍ່ ແລະ ເຄືອຂ່າຍທີ່ສົມບູນແບບ, ເພື່ອສະໜອງການບໍລິການທີ່ມີຄຸນນະພາບ ແລະ ປະສົບການອັນມະຫັດສະຈັນໃຫ້ແກ່ລູກຄ້າປາຍທາງຂອງລາວໂທລະຄົມ.

ບົດບັນທຶກຄວາມເຂົ້າໃຈນີ້, ເປັນການຮັດແໜ້ນການຮ່ວມມືແບບຍຸດທະສາດຂອງສອງບໍລິສັດດັ່ງກ່າວ. ບໍລິສັດໂນເກຍຊຽງໄຮ່ເບວໄດ້ໃຫ້ຄຳໝັ້ນສັນຍາວ່າຈະສະໜອງທິດທາງການແກ້ໄຂບັນຫາດ້ານໂທລະຄົມແບບປາຍທາງສູ່ປາຍທາງ ແລະ ການບໍລິການທີ່ດີໃຫ້ແກ່ບໍລິສັດລາວໂທລະຄົມ, ນອກຈາກ 2ຈີ, 3ຈີ, 4ຈີ ແລ້ວທັງສອງຝ່າຍຍັງຄອງຄອຍການຮ່ວມມືໃນດ້ານເຕັກໂນໂລຢີອັນໃໝ່ໆ ເປັນຕົ້ນ: ລະບົບ 5ຈີ, NB-IOT, VR, CLOUD ແລະອື່ນໆ ອີກດ້ວຍ.

ທ່ານ ຖາວອນ ຜູ້ອຳນວຍການ ບໍລິສັດ ລາວໂທລະຄົມ ໄດ້ກ່າວວ່າ: “ພວກເຮົາໄດ້ຕີລາຄາສູງຕໍ່ກັບ ການປະກອບສ່ວນພັດທະນາພື້້ນຖານໂຄງລ່າງ ດ້ານໂທລະຄົມມະນາຄົມ ກໍ່ຄືຂະຫຍາຍເຄືອຂ່າຍສັນຍານໂທລະສັບ ໃນໄລຍະ20 ປີ ຜ່ານມາ ຂອງບໍລິສັດ ໂນເກຍ ຊຽງໄຮ່ເບວ. ການເຊັນບົດບັນທຶກຄວາມເຂົ້າໃຈກ່ຽວກັບ ຍຸດທະສາດການຮ່ວມມື ແລະ ໂຄງການຂະຫຍາຍເຄືອຂ່າຍ 5G ໃນຄັ້ງນີ້ບໍ່ພຽງແຕ່ສະແດງໃຫ້ເຫັນຜົນສໍາເລັດໃນການຮ່ວມມື ລະຫວ່າງບໍລິສັດ ລາວໂທລະຄົມ ກັບ ບໍລິສັດ ໂນເກຍຊຽງໄຮ່ເບວ ເທົ່ານັ້ນ, ແຕ່ມັນຍັງສະແດງໃຫ້ເຫັນວ່າ ບໍລິສັດ ລາວໂທລະຄົມ ແມ່ນບໍເຄີຍຢຸດຢັ້ງທີ່ຈະພັດທະນາ ແລະນຳໃຊ້ເຕັກໂນໂລຢີໃໝ່ໆ ເພື່ອສະໜອງປະສົບການອັນໃໝ່ໆ ໃຫ້ແກ່ຜູ້ຊົມໃຊ້”.

ທ່ານ ໄມ ຫວາງ ອຳນວຍການ ບໍລິສັດ ໂນເກຍຊຽງໄຮເບວ ໃຫ້ຮູ້ວ່າ: “ພວກຂ້າພະເຈົ້າ NSB ມີຄວາມຍິນດີ ແລະພາກພູມໃຈຫຼາຍ ທີ່ໄດ້ເປັນຜູ້ສະໜອງທິດທາງການແກ້ໄຂບັນຫາດ້ານໂທລະຄົມ ແບບຄົບວົງຈອນໃຫ້ແກ່ ລາວໂທລະຄົມ, ໂນເກຍຊຽງໄຮເບວ ຈະສະໜອງອຸປະກອນ ແລະ ທິດທາງການແກ້ໄຂບັນຫາຂອງໂນເກຍ ຊຶ່ງເປັນຜູ້ນຳ ດ້ານເຕັກໂນໂລຢີລະດັບໂລກ ໃຫ້ແກ່ ລາວ ໂທລະຄົມ, ເພື່ອຊ່ວຍໃຫ້ລາວໂທລະຄົມ ກ້າວໄປສູ່ຍຸກແຫ່ງເທັກໂນໂລຢີ ອັນໃໝ່ ແລະ ທັນສະໃໝ ຢ່າງບໍ່ຢຸດຢັ້ງ”

ບໍລິສັດ ລາວ ໂທລະຄົມ ແລະ ບໍລິສັດ ໂນເກຍຊຽງໄຮເບວ ໄດ້ເລີ່ມຮ່ວມມືກັນມາແຕ່ຊຸມປີ 1990 ເປັນຕົ້າມາ , ຊຶ່ງທັງສອງຝ່າຍໄດ້ ມີແນວທາງການຮ່ວມມືແບບສະຖຽນລະພາບໃນໄລຍະຍາວ. ສັນຍາການຂະຫຍາຍເຄືອຂ່າຍ ແລະ ບົດບັນທຶກຄວາມ ເຂົ້າໃນກ່ຽວກັບ ຍຸດທະສາດການຮ່ວມມື ແລະ ໂຄງການຂະຫຍາຍເຄືອຂ່າຍ 5G ນີ້ ຈະເປັນທ່າແຮງຊ່ວຍໃຫ້ ລາວ ໂທລະຄົມ ຮັກສາຕຳແໜ່ງດ້ານການຕະຫຼາດ ແລະ ຊຸກດັນໃຫ້ ລາວ ໂທລະຄົມພັດທະນາຂຶ້ນໄປເລື້ອຍໆ.